ನನ್ನೆದೆ ಗೂಡಿನ ಪಾರಿವಾಳ ನೀನು
ಹಾರಲು ಶಕ್ತಿ ಕೊಟ್ಟವನೆ ನಾನು
ರೆಕ್ಕೆಪುಕ್ಕ ಬಂದಿದ್ದೆ ತಡ
ಮನದ ಮನೆಯಿಂದ ಹಾರಿಹೋದೆ ನೀನು
ಮಧು'ರ ಮಾತಿಗೆ ಮರುಳಾಗಿ ಹೋದೆ
ಮನದ ಬಯಕೆಯ ಅರಸುತ್ತ
ಸೇಡಿನ ಅವಸರದಿ ಕುರುಡಾಗಿ
ಕತ್ತಲಲಿ ಬೆಳಕ ಹುಡುಕಿದೆ
ಜೇನುಗೂಡಿಗೂ ಸಿಹಿ'ಯಾಗದೆ
ಕಹಿಯಾಗಿ ಕತ್ತಲೆಯಾಗಿ ದೂರವಾದೆ !!!
ವಿಷ್ಣು ಹೆಗಡೆ , ಕುಮಟಾ
ಬೆಳಗಲಿ ದೀಪ
ಮನದ ಹಣತೆಯಲಿ
ಮರೆಯಾಗಲಿದೆ ಕಹಿಯೆಂಬ ಕತ್ತಲೆ
ದೀಪಾವಳಿಯ ಬೆಳಕಿನಲಿ
ಚಿಂತೆಯೆಂಬ ಚಿತೆಯನ್ನ ಬದಿಗೊತ್ತಿ
ಚೈತನ್ಯದಿ ಮುನ್ನಡೆಯೋಣ
ಹೊಸ ಬದುಕಿಗೆ ಮುನ್ನುಡಿ ಬರೆಯೋಣ
ದೀಪಾವಳಿಯ ಬೆಳಕಿನಲಿ
ದೀಪ ಬೇಕಾಗಿರುವುದು ಮನಕೆ
ಬಾಳ ದಾರಿಯ ಪಯಣಕೆ
ಬೆಳಗೋಣ ದೀಪವನ್ನ
ದೀಪಾವಳಿಯ ಬೆಳಕಿನಲಿ
ಪಟಾಕಿ, ಸಿಡಿಮದ್ದುಗಳ ಸದ್ದಿನಲಿ
ಕಿವುಡಾಗಿ ಸಾಗಿದೆ ಜೀವನ
ಬೆಳಕಿನಬ್ಬರಕೆ ಕುರುಡಾಗಿದೆ ಕಣ್ಣು
ಹೊಸ ಗಾಳಿ ಬೀಸುತ್ತಾ ?
ದೀಪಾವಳಿಯ ಬೆಳಕಿನಲಿ..!
( ಎಲ್ಲರಿಗೂ ದೀಪಾವಳಿಯ ಶುಭಾಶಯ )
ವಿಷ್ಣು ಹೆಗಡೆ, ಕುಮಟಾ
ಕವಲು ದಾರಿಯಲ್ಲಿ ಸಾಗಿದೆ ಜೀವನ
ಅದೊ - ಇದೊ
ಅಲ್ಲೊ - ಇಲ್ಲೊ
ಎಲ್ಲಿ ಬದುಕಬೇಕೆಂಬ ಗೊಂದಲ
ಈ ಮನಕೆ
ಕೈಬೀಸಿ ಕರೆಯುತ್ತಿದೆ ತಾಯಿಪ್ರೀತಿ
ತಂದೆಯ ಉದ್ಯೋಗ
ಕೊನೆಗೂ ಆರಿಸಿಕೊಂಡೆ ಆಯ್ಕೆಯನ್ನ
ಆತುರದ ನಿರ್ಧಾರವಲ್ಲವಿದು
ಯೋಚಿಸಿರುವೆ ಹಗಲಿರುಳು
ನಿದ್ದೆಯಿಲ್ಲದೆ ಕಳೆದಿರುವೆ ಎಷ್ಟೊ ರಾತ್ರಿ
ಮನೆಯಲ್ಲೆ ಬೆಳದಿಂಗಳಾಗುವ ಬಯಕೆ
ಈ ಮನಕೆ
ಸುಂದರ ಗೋಪುರ ಕಟ್ಟಿರುವೆ ಮನದಿ
ಕಲ್ಪನೆಯಲ್ಲಿ ಅರಳಿವೆ ಕನವರಿಕೆಗಳು
ಹತ್ತಾರು ಯೋಜನೆಗಳು
ಊರಿಗೆ ಊರುಗೋಲಾಗುವ ಬಯಕೆ
ಈ ಮನಕೆ
ಎಲ್ಲಿಂದ ಎಲ್ಲಿಗೆ ಪಯಣ
ಸಾಕಾಗಿದೆ ಈ ಪ್ರಯಾಣ
ದೂರದೂರಿನ ಬುದುಕು ಬಲು ಭಾರ
ತಾಯಿಮಡಿಲಲ್ಲಿ ನೆಲೆಯಾಗಬೇಕೆಂಬ ಆಸೆ
ಈ ಮನಕೆ
ಚಿಂತೆಯಿಲ್ಲ, ನಂಬಿಕೆಯಿದೆ
ನನ್ನ ಮೇಲೆ ನನಗೆ
ಜೀವನದಲ್ಲಿ ಗೆಲ್ಲುತ್ತೇನೆಂಬ ಭರವಸೆಯಿದೆ
ಬಾಳ ದೋಣಿಯಲ್ಲಿ ಈಜುತ್ತೇನೆಂಬ ಛಲವಿದೆ
ಈ ಮನಕೆ
ಟೀಕೆಗಳಿವೆ ಹಲವಾರು
ಉತ್ತರಿಸುವೆ ಇಂದಲ್ಲ ನಾಳೆ
ಮಾತಿನಿಂದಲ್ಲ, ಮೌನದಿಂದ
ಇದು ಈ ಮನದ ಬಯಕೆ!
ವಿಷ್ಣು ಹೆಗಡೆ, ಕುಮಟಾ
